ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបញ្ចេញវីដេអូដ៏កម្រមួយដែលមានរយៈពេល ៨នាទីអំពីសន្និសីទកាសែតដែលសម្ដេចបានធ្វើឡើងបន្ទាប់ពីមានជំនួបលើកដំបូងជាមួយនឹងសម្ដេចព្រះ នរោត្តម សីហនុ។

សម្ដេចតេជោ ហ៊ុន សែន បានបង្ហោះវីដេអូមួយទាំងពាក់កណ្ដាលអាធ្រាតថ្ងៃទី៥ ឈានចូលថ្ងៃទី៦ ខែមីនា ឆ្នាំ២០២៣ នេះជាមួយនឹងសំនេរមួយថា៖ «ជំនួបលើកទីមួយដែលគេតែងនិយមហៅថាជំនួបរវាង សីហនុ ហ៊ុន សែន ថ្ងៃ២ ដល់៤ ធ្នូ ១៩៨៧ នៅប្រទេសបារាំងដែលជាការចាប់ផ្តើមការស្វែងរកសន្តិភាពតាមរយៈការចរចារ។ កិច្ចព្រមព្រៀងប៉ារីសបានចាប់ផ្តើមចេញដំណើរពីទីនេះដោយភាគីខ្មែរនាំមុខដោយសម្តេចព្រះ នរោតម្ត សីហនុ និង ហ៊ុន សែន។ សូមស្តាប់សំដីនាយករដ្ឋមន្ត្រីវ័យក្មេងនាពេលនោះក្នុងសន្និសិទ្ធសារព័ត៌មានថ្ងៃ ៤ ធ្នូ ១៩៨៧ បន្ទាប់ពីការចុះហត្ថលេខាលើសេចក្តីប្រកាសរួម សីហនុ ហ៊ុន សែន»។

សន្ធិសញ្ញាសន្តិភាពក្រុងប៉ារីសត្រូវបានបង្កើតឡើងនៅថ្ងៃទី២៣ ខែតុលា ឆ្នាំ១៩៩១ ដោយមានសម្ដេចតេជោ ហ៊ុន សែន គឺជាភាគីមួយនៅក្នុងភាគីហត្ថលេខីនៃកិច្ចព្រមព្រៀងនេះ ក្នុងគោលដៅបញ្ចប់សង្គ្រាមក្នុងប្រទេសកម្ពុជា នឹងអនុញ្ញាតឲ្យកងទ័ពអង្គការសហប្រជាជាតិចូលមកថែរក្សាសន្តិសុខ និងសន្តិភាពនៅក្នុងប្រទេស។ កិច្ចព្រមព្រៀងនេះមានប្រទេសជាសាក្សីចំនួន១៨ ក្នុងនោះក៏មានប្រទេសមហាអំណាចទាំង៥ផងដែរ។

ទោះជាយ៉ាងណាសន្ដិភាពមិនទាន់អាចរកបាននៅឡើយទេរហូតដល់នយោបាយឈ្នះឈ្នះ របស់សម្ដេចតេជោសម្រេចជោគជ័យ នៅថ្ងៃទី២៩ ខែធ្នូ ឆ្នាំ១៩៩៨៕